అవేరా కవితలు 176 నుండి 200

అయుత కవితా యజ్ఞం
27/02/2016
సహస్రకవి 101
కవిత సంఖ్య:176
కవి: అనుసూరి వేంకటేశ్వరరావు
అంశం : సామాజికం
శీర్శిక: కన్నీళ్ళు

నేను పుట్టానని
కన్నీరు పెట్టావా అమ్మా!
అత్త మామ భర్తల
సూటి పోటి మాటలకెంత
బాధ పడ్డావో!
ఆడపిల్లనై పుట్టి
అందరినీ బాధపెట్టానా అమ్మా!
అక్కపుట్టినప్పుడూ
ఇలాగే బాధపడ్డావుట
అప్పుడూ కన్నీరు పెట్టావట
నీవు పడిన బాధ
నా మనసును
కలచివేసి కన్నీరై
ఉబికింది....
ఆడపిల్లగా పుట్టి
కళ్ళలో కన్నీటికుండలు
దాచాను
నీవూ ఆడవైపుట్టి
కన్నీటి బతుకులో
సగం కుండ ఖాళీ చేసావు
అమ్మ కడుపున పుట్టి
రేపటి అమ్మ లను
అసహ్యించుకునే
అమ్మలనేమనాలి?
నాన్నైనా అమ్మైనా
ఓ అమ్మ కడుపునే పుట్టాలి కదా అమ్మా .!
ఆడపిల్లే లేకుంటే
రేపు నిన్ను కనేదెవరు??
****అవేరా***






     

అయుత కవితా యజ్ఞం
అయుత కవితా యజ్ఞం
27/02/2016
సహస్రకవి 101
కవిత సంఖ్య:177
కవి: అనుసూరి వేంకటేశ్వరరావు
అంశం : ఆద్యాత్మికం

శీర్శిక: బ్రహ్మానందం

జీవితమంటే??
జీవించడం కోసం.....
తినుట తిరుగుట
పడుకొనుట
పనులు చేసుకొనుట
చేసిన పనులే పదేపదే చేయుట
ఇంతేనా జీవితం?
నీకేనాడైనా
స్ఫురించిందా
ఈ ప్రశ్న.....??

జీవించు ...
జీవిస్తూనే....
నీ జీవితం పై
అవగాహన ఏర్పరచుకో
నీ జీవిత పరమావధి ఏమిటి?
పెళ్ళి పిల్లలు
ఆస్తులూ
అంతస్తులూ
సుఖభోగాలూ
ఇవేగా??
వీటి కోసం
ఉరుకులు
పరుగులతో
అలసిపోతున్నావు
ఆశల విష సర్పాన్ని
మెడలో వేసుకున్నావు
నిజ జీవిత సంగీతాన్ని
వినలేని బధిరుడవైనావు
ఆశల కోసం
నిత్య సంఘర్షణలలో
సుఖ శాంతులు
దూరమై
మానసిక ఆందోళనలతో
కాపురం చేస్తున్నావు.....

జీవిత ప్రవాహ
గమనం అగమ్య గోచరం
జీవితగమనాన్ని గ్రహించి
ఆశలు ఆందోళనలను
విడిచి బ్రహ్మానందాన్ని
పొందవచ్చు...

జీవితం
జీవించటానికే
ఎవరికోసం?
దేనికోసం?
ఎందు కోసం?
జీవిత సత్యాన్ని
గ్రహించిన వాడే
లక్ష్యాన్ని సాధిస్తాడు....

పరిపూర్ణ జ్ఞానసాగరంలోకి
నీ జీవిత నావలో
ప్రయాణం ప్రారంభించు
కోరికల గొలుసులను
"ఆశ" తాడుల ముడులను
భవబంధాలను
అరిషడ్వర్గాలనే
తీరపు బంధాలనుతొలగించిన
తీరంతో బంధం
తెగి నీ నావ
తెరచాప రెపరెపలతో
అనుకూల పవనాల
దిశానిర్దేశ్యంతో
నీ జీవితాన్ని నడిపిస్తాయి....

జీవితమంటే..
ఎత్తైన పర్వత సాణువుల
మద్యన కొండల కోనల నడుమ
పరవళ్ళు తొక్కుతూ
నదిలా
సాగిపోతుంది
సాగరంవైపు....

రాత్రిపూట
ఆకాశంలో నక్షత్రాలు
వెండి పూవులై
నిండినపుడు
తదేకంగా వాటినే చూడు..

అనంతమైన
కడలి కెరటాలు
ఆనంద నాట్యం చేస్తున్నప్పుడు
తదేకంగా వాటినేచూడు....

ఒక మొగ్గ విరియు నప్పుడు
పూవై పరిమళాలు
వెదజల్లేటప్పుడు
తదేకంగా ...
దృష్టి మరల్చకుండా
నాసికతో....
పరిమళాణ్ణి ఆఘ్రాణించినపుడు
దివ్య మర్మము అవగతమౌతుంది
జీవిత సత్యం పరిచయమౌతుంది

****అవేరా***






     

అయుత కవితా యజ్ఞం
అయుత కవితా యజ్ఞం
28/02/2016
సహస్రకవి 101
కవిత సంఖ్య:178
కవి: అనుసూరి వేంకటేశ్వరరావు
అంశం : ప్రకృతి
శీర్శిక: నయనానందం

అడవిలోన
ఆకాశానికి నిచ్చెన
వేసే మహావృక్షాలను
చూసినపుడు...

అడవి మోదుగలు
గుంపుగ పూచినపుడు...

మయూరాలు
పురి విప్పియాడినపుడు....

చిరుఝల్లులలో
ఆకాశాన....
హరివిల్లు విరిసినపుడు...

తడిసిన రెక్కల
నారబోయు
పావురాల రెక్కల రెపరెపలాడినపుడు...

తొలకరి వానకు
కప్పలు బెకబెకలాడుచు
నాట్యం చేయునపుడు...

గలగల పారే సెలయేరు
నిరంతరం నదీనదాలతో
మమేకమవుతున్నప్పుడు...
నదీనదాలు బిరబిరా
సాగరం వైపు
సాగి పోతున్నప్పుడు....

ఆకుపచ్చని తివాచీ
సోయగాలు పరచిన
ప్రకృతిని తిలకించినప్పుడు....

ఆ నయనానందకర
దృష్యాలను
మనసున అనుభూతి చెంది
నిలుపుటకు
రెండు కనులు చాలవు
ఆ ప్రకృతికి
ఓ ఆకృతిని
ఏర్పరచిన
విరించీ నీకు వందనం!!!

****అవేరా***






     

అయుత కవితా యజ్ఞం
29/02/2016
సహస్రకవి 101
కవిత సంఖ్య:179
కవి: అనుసూరి వేంకటేశ్వరరావు
అంశం : సామాజికం
శీర్షిిక: మానవమృగం
(28/02/2016 నాడు ఠానే ,మహారాష్ట్ర
లో జరిగిన యదార్థ గాధ)

మానవత చచ్చిపోయింది
మమకారం తల వాల్చేసింది
మమత సమాధి అయింది
భవిత మంటకలిసింది....

మనవ మృగాల
పాశవికతకు
ఏ పాశమూ
పాశము కాలేదని
మరో ఋజువీ
దుష్టాంతం....

రక్తం పంచి
కని పెంచి
ప్రేమను పంచిన
తల్లిదండ్రి ....

తన చేయి పట్టి
తనవాళ్ళనొదలి
సర్వస్వం అర్పించి
సర్వస్వంగా భావించిన
కట్టుకున్న భార్య....

తనరక్తం పంచుకుని
తన భుజాలపై ఆడుకున్న
పిల్లలు....

మామయ్యా అన్న
పిలుపులోని మాధుర్యాన్ని
పంచిన మేన కోడళ్ళు
మేనళ్ళుల్లు....

ఆ మానవ మృగం
మృగతృష్ణ కు
బలియైనారు
కృూరంగా
గొంతులు కోసి
రక్తపు మడుగులో
రక్తకాలాడిన(జలకాలాడి)...
ఆ మానవమృగం
మృగతృష్ణకు
బలియైనారు....

ముద్దులొలుకు
బోసినవ్వులకు
కరగలేదా ఉన్మాది హృదయం
పసివాళ్ళనీ
పాశవికంగా
కత్తితో లేత గొంతులు కోసి
రక్తకేళి యాడి
తృష్ణ తీరాక
తన గొంతుకు
ఉచ్చు వేసికొని
వేలాడిన
నిలువెత్తు పిశాచి...
మృగ మనిషి....
హుస్సేన్ అన్వర్ పరేకర్
పైశాచిక గాధ ఇది...!!

****అవేరా***






     

అయుత కవితా యజ్ఞం
అయుత కవితా యజ్ఞం
29/02/2016
సహస్రకవి 101
 కవిత సంఖ్య:180
కవి: అనుసూరి వేంకటేశ్వరరావు
అంశం : సామాజికం
శీర్శిక: భయం

కంట కునుకు రాదు
కునుకేయగ
భయము పోదు
భయమున వణుకు పోదు
దొంగల కలకలలు
దోపిడీల విలవిలలు
స్నాచింగుల వలవలలు
వీధులెంట నడచినా....
బైకు పైన వెళ్ళినా.....
బస్సులెక్కినా....
ఇంటిపట్టునున్నా....
భయం....భయం
రెచ్చిపోతున్న దొంగలు
పుచ్చిపోతున్న స్నాచర్లు
కేసులలో...
అతీ గతీ లేని
పురోగతి.....
భయం గుప్పిటలో
భాగ్య నగరం
బిక్కు బిక్కుమంటున్నది....

****అవేరా***






     

అయుత కవితా యజ్ఞం
అయుత కవితా యజ్ఞం
అయుత కవితా యజ్ఞం
అయుత కవితా యజ్ఞం
29/02/2016
సహస్రకవి 101
కవిత సంఖ్య:181
కవి: అనుసూరి వేంకటేశ్వరరావు
అంశం : సామాజికం
శీర్శిక: పరీక్ష

పరీక్షల కాలమిది
వత్తిడి లేక
ఆరోగ్యంగా
భయం లేక
విశ్వాసంగా
ఆందోళన లేక
ఆత్మవిశ్వాసంతో
తొట్రుపాటులేక
విజయ దృక్పథంతో....

సన్నద్ధమవ్వండి
జ్ఞాన యుద్దానికి
సన్నద్ధమవ్వండి
జ్ఞాన యజ్ఞానికి......

ఇష్టపడి చదవండి
దివ్యంగా రాయండి
ప్రతిభకు మార్కులు
కొలమానం....
మార్కులు కాదు
ప్రతిభకు కొలమానం....

అతి విశ్వాసం వద్దు
నిరాశానిస్పృహలూ వద్దు ...

నిద్ర.....
ఆహారం....
ఆరోగ్యం....
నిర్లక్ష్యం వద్దు.....

పరీక్షల ముందు
అలసట వద్దు
ప్రశాంతత ముద్దు...

ప్రణాలికతో చదవండి
ప్రశాంతంగా వుండండి
అనివార్యత నడుమ
ఎన్నో ఆశలు
ఎన్నో ఆకాంక్షలు
స్వేచ్ఛగా
స్వచ్ఛంగా
మందుకెళ్ళండి
విజయం మీదే....!!

****అవేరా***






     

అయుత కవితా యజ్ఞం
అయుత కవితా యజ్ఞం
29/02/2016
సహస్రకవి 101
 కవిత సంఖ్య:182
కవి: అనుసూరి వేంకటేశ్వరరావు
అంశం : సామాజికం
శీర్శిక: సామాజిక సంతాన వ్యవస్థ
(మన పూర్వీకులు ముందుచూపుతో
ఏర్పరచిన సప్త సంతాన కవచం)

సమాజం
సప్త సంతాన యుక్తం
ఈ సంతాన పోషణ
సామాజి కావసరం...అనివార్యం...

నీరు లేక జీవమే లేదు
నీరే మనిషికి ప్రాణాధారం
అందుకే...
"తటాకము "
ప్రథమ సంతానం...

"దేవాలయం"....
దైవారాధన నిలయం
నాట్య, సంగీత,
సాహిత్యాది
కళల నెలవు
రెండవ సంతానం....

వారసుల భవిష్యత్
అవసరాలకు
నిధినిక్షేపాలను
కాపాడుటకు
పుడమి ధనము దాచు
నిధి నిక్షేపములుగా....
ఆనాటి "నిధి నిక్షేపాలు"
ఈనాడు వివిధ రూపాలు
రేపటి అవసర నిధియే
"భవిష్యనిధియే"
మూడవ సంతానం...

ఆనాడు
ప్రభవించిన
కవిపండితులకు...
కళాకారులకు...
పురోహితులకు....
ఇచ్చినదానమే
గ్రామాలు
అవే "అగ్రహారాలు"
చతుర్థ సంతానము....

సమాజిక సేవ
ధర్మనిబద్దత
ఉపదేశాత్మక
కావ్యాలు
కవి ప్రసాదాలు
నైతిక భాండాగారాలు
ఈ గ్రంధాలు
"ప్రబంధాలు "
పంచమ సంతానం....

పర్యావరణ స్పృహతో
పుడమిన పచ్చదనం
వర్థిల్లగ వనసంరక్షణకు
"వనము"
ఆరవ సంతానమైంది...

వంశాన్ని నిలుపు వాడు
పున్నాగ నరకము నుండి గాచువాడు
వంశగౌరవం నిలుపు వాడు
సృష్టి ధర్మాన్ని గాచు వాడు
పుత్రుడు సప్తమ సంతానం.....

సప్త సంతానాల రక్ష
భాద్యత మరచి
చెరువుల నాశనం
దేవాలయ
కుంబకోణాలు
ధార్మిక కార్యాల
పట్ల నిర్లక్ష్యం
కవిపండిత
కళాకారుల
ప్రోత్సాహలేమి
అవమానం
పుత్రులకు
కొరవడిన మార్గదర్శనం
సప్త సంతాన వ్యవస్థ
నిర్వీర్యమై
మానవ మనుగడ
అస్తవ్యస్తమౌతుందీనాడు....!!
మనిషీ మేలుకో...
నీ సంతానాన్ని రక్షించుకో...!!

****అవేరా***


     

అయుత కవితా యజ్ఞం
29/02/2016
సహస్రకవి 101
 కవిత సంఖ్య:183
కవి: అనుసూరి వేంకటేశ్వరరావు
అంశం : సామాజికం
శీర్శిక: వ్యవసాయం

సాగులేక కూడులేదు
భూమిలేని కౌలురైతుకు
ఎంతకష్టం....
ఎంత నష్టం....
అన్న దాతకు కన్నీళ్ళే...
అన్నదాతకు కష్టాలే...

పంటేదైన పాట్లు తప్పవు
ఉసూరుమంటూ
వానచినుకు కోసం
ఆకాశాన్ని చూస్తున్నాడు
మబ్బు కోసం ఆశగా చూస్తున్నాడు
ఉసురు తీసుకుంటున్నాడు....

పత్తి కష్టాల నిప్పు
అన్నిపంటలకూ అంటుకుంది
కాష్టాల నిప్పుకు
ఆజ్యమయ్యింది
శవాల కమురు
నింగికెగిసింది....

కూరగాయల సాగూ
కుదేలయింది
నష్టాల సుడిగుండాల్లో చిక్కి
అసువులు తీసుకుంటున్నాడు
బక్కరైతు
అనాథలైన కుటుంబం
ఆవేదన
కన్నీటి
వరదైంది
పంటకు పనికి రాని
ఉప్పునీటి
సంద్రమైంది...!!

****అవేరా***






     

అయుత కవితా యజ్ఞం
అయుత కవితా యజ్ఞం
04/03/2016
సహస్రకవి 101
 కవిత సంఖ్య:185
కవి: అనుసూరి వేంకటేశ్వరరావు
అంశం : సామాజికం
శీర్శిక: పెళ్ళి-పెటాకులు

నడకలో నడకై...
కళ్ళల్లో కళ్ళు పెట్టి చూసీ...
మనసుతో మనసు కలిపి ...
పెళ్ళికాని ప్రేమ పక్షులు
రయ్...రయ్..న
ప్రేమ లోకంలో విహరించి
బోర్ కొట్టి
మనసులు విరిగి
బై...బై ...ని చెప్పుకుంటే .....బ్రేకప్..!

చేయీ చేయీ కలిపి
మాంగల్యధారణతో
ఒక్కటై...

చేతి రింగులు
మార్చుకుని
దంపతులై...

కుబూల్ హై..
కుబూల్ హై..
కుబూల్ హై
అని షాదీ తో
ఒక్కటై...

మనువాడి....
మనసులు కలవక
తనువులు విడివడి
విడాకుల పెడాకులైతే...
తలాక్....డైవోర్స్...!!

సంప్రదాయాలను
తుంగలో తొక్కుతూ
అపనమ్మకం
తిమిరమై
మనసున
ముసరగా
తిమిరాంధకారంలో...
మిణుగురుల
వెలుగుకోసం..
అన్వేషిస్తూ...
భరోసా కోసం..
షరతులతో...
ఒప్పందాలతో...
వివాహం చేసుకుంటే...
....ప్రినప్స్...!!!

సంప్రదాయం..
విడిపోవటానికి
కాదు ..పెళ్ళి..
కలిసుండటానికంటుంది...
ఇద్దరు మనుషులను
కలిపి...
ఒకటిగా బ్రతుకమంటుంది...

ప్రేమ...
అనురాగం...
ఆప్యాయత..
అంకితభావం...
ఇద్దరు మనుషుల
మద్యన
పెనవేసే
బంధాలు....
జీవితాంతం
కలిసుండే
అనుబంధాలు...
ఈ బంధాలకు
పునాదే
 నమ్మకం....

నమ్మకమే..
కాపురానికి పునాది...
ఆనమ్మకమే
లేనప్పుడు..
ఆ కాపురం
పునాది లేని
మేడే కదా??

పునాది లేకుండా
మేడను కట్టాలనుకోవటం
మూర్ఖత్వం...
ఆ మూర్ఖత్వం పేరే
ప్రినప్స్...!!!

****అవేరా***






     

04/03/2016

04/03/2016
సహస్రకవి 101
కవితసంఖ్య:186
కవి: అనుసూరి వేంకటేశ్వరరావు
హైదరాబాద్
అంశం : సామాజికం
శీర్శిక: క్షమించు జీవించు

తప్పులు...
పొరపాటులు....
తెలిసి చేయటం
అనుకోకుండా జరగటం
తప్పులెలా జరిగినా..
నష్టం నిశ్చయం...
నష్టం జరిగినా...
కష్టం కలిగినా...
తప్పు తెలుసుకుని
సారీ చెప్పిన
పశ్చాత్తాప పడిన వారిని
క్షమించాలంటే
ఆకాశమంత
హృదయం కావాలి...

క్షమించి విసిరే
ఒక చిరునవ్వు
ఇరువురి
స్నేహానికి
విరిజల్లు...
విభేధాల
నిప్పునార్పే
వానచినుకు...
ఆచిరునవ్వు...
మనసున పూసిన
కళాత్మక పువ్వు!

వాద ప్రతివాదనలు
కోప తాపాలూ
ప్రతీకారేచ్చలతో....
మానసిక రుగ్మతలకన్నా..
క్షమా గుణంతో....
మానసిక స్వాంతన పొందాలి...
మేలు జరుగుతుంది...
ఆరోగ్యానికి...
సమాజానికి...

****అవేరా***
ఈ రచన నా స్వంతం దేనికి
అనువాదం అనుకరణ కాదని
హామీ ఇస్తున్నాను
అనుసూరి వేంకటేశ్వరరావు
హైదరాబాద్




     

అయుత కవితా యజ్ఞం
అయుత కవితా యజ్ఞం
06/03/2016
సహస్రకవి 101
 కవిత సంఖ్య:187
కవి: అనుసూరి వేంకటేశ్వరరావు
అంశం : సామాజికం
శీర్శిక: మహిళ(కథ)

భానుని ప్రత్యూష
కిరణాల వెలుగు సోకగానే
పక్షులు కిలకిలారావాలు
సుప్రభాతమైంది తనకి

లేచి తన
నిత్యకృత్యాలకాయుక్తమైంది
భారమైనా
భాద్యతను
బుజానికెత్తుకుంది

ఫ్రిడ్జ్ తెరచి
పాల పాకెట్
తీసింది
నిద్రచాలక
కళ్ళు మూతలు పడుతున్నాయ్
మత్తుగా...
తెల్ల కలువలు
ఎర్ర కలువలయ్యాయి...
స్టౌ వెలిగించి
పాలు పెట్టింది

కొడుకు గదికెళ్ళింది
నిద్రాదేవి ఒడిలో
మరోలోకంలో
తేలిపోతున్నాడు...
దగ్గరికి వెళ్ళి
నుదుటి పై
తన గులాబీ
అధరాలనాన్చి
చుంబించింది ఆర్తిగా
"లే నాన్నా స్కూల్ కెళ్ళాలి"
అంతలో...
సు...య్...య్ మన్న
చప్పుడు విని
వంటింటి వైపు
పరుగు..
చూస్తే...
సగం పాలు నేల పాలు
బాధపడకూడదనేమో
పెద్దలు చెప్పారు
పాలు పొంగితే శుభమని.....
పాలు దించి
ఇడ్లీ పాత్రనుంచింది
స్టౌ పైన



***అవేరా***






     

అయుత కవితా యజ్ఞం
అయుత కవితా యజ్ఞం
06/03/2016
సహస్రకవి 101
 కవిత సంఖ్య:188
కవి: అనుసూరి వేంకటేశ్వరరావు
అంశం : సామాజికం
శీర్శిక: మహిళ1
(08/03/2016 మహిళాదినోత్సవం కోసం)
ప: వేకువకే మేలుకొలుపు
     మేలుకున్న మహిళమ్మా...
     అందుకోమ్మ చందనమిదె
     అందుకోమ్మ వందనం...

చ1: మరపు రాని రోజు నేడు
       మహిళా దినోత్సవం...
       మీ సేవల సాక్షిగా
       ఎగిరె విజయ బావుటా.....వేకువకే*
 చ2:ఆధునికత ఆలంబన
        బిందు సేద్య బంధంతో
        బంగరు వ్యవసాయం
        బాగు బాగు ఎల్లవ్వ.
         వందనమిదెనీకమ్మా !!.........వేకువకే*
చ3:తెలంగాణ ఉద్యమాన
       తెగువతోటి పోరుసలిపి
       ధూంధాం అంటూ
       దుమ్ము దులిపి నిలిచావు
       మందుల విజయమ్మా
       వందనమిదె నీకమ్మా!!..........వేకువకే*
 చ4:తెలంగాణ రైతాంగ
        సాయుధ పోరాటానా
        వీరనారి యోధురాలు
        చెన్నబోయిన కమలమ్మా
        వందనమిదె నీకమ్మా!!............వేకువకే*
చ5:బాలల వికాసానికై
       సేవా సంస్థల స్థాపన
       బాలథెరిసా గ నీవు
       సార్థకనామము నీది
      వందనమిదె నీకమ్మా!!..............వేకువకే*
చ6:నాజిల్లా వరంగల్లని
      కదంతొక్కి
      పదంపాడి
      తెలంగాణ
     ఉద్యమంలో
     ఊపిరియైనావమ్మా
    కూనమల్ల సంధ్యమ్మ
     వందనమిదెనీకమ్మా!!..............వేకువకే*
చ7:చైతన్యపు
      వెలుగు జిలుగు
      గ్రామానికి పాకెననుట
      నీవె..నీవె..నిదర్శనం
      చైతన్యమె సుదర్శనం
      కుంర మన్కూబాయి
      వందనమిదె నీకమ్మా............వేకువకే*
చ8:ఆధునిక
       వ్యవసాయం
       ప్రకృతితో
       ఫలసాయం
       దిక్సూచిగ
       నిలిచావు
       రైతు భుజం తట్టావు
       మన్నెం సరితా రెడ్డమ్మా
       వందనమిదె నీకమ్మా!!.............వేకువకే*
చ9:సాహితీసేవలోన
       తెలంగాణ బిడ్డవై
       మహిళా అద్యయనంలో
       మహిళకు చుక్కానివై
       ఉద్యమ చైతన్యానికి
       ఊపిరిలూదావు
       గోగుశ్యామలమ్మ
       వందనమిదెనీకమ్మా!!.............వేకువకే*
చ10:సాహసమే చేయదా
          సెల్యూట్ నీకమ్మా!.....
          స్వయం ఉపాది ఏదైనా
          బ్రతుకు బండిలాగాలని
          ఆటోడ్రైవరై
          ఆత్మస్తైర్యానికే
          ఆదర్శమైనావు
          తారాబాయమ్మా
           వందనమిదె నీకమ్మా!!............వేకువకే*

             (ఇంకావుంది)
రచన:అనుసూరి వేంకటేశ్వరరావు హైదరాబాదు
పై కవితను ఎవరైనా రచయిత పేరు లేకుండా
ఇతర గ్రూపులలో  పోస్ట్ చేయుట నేరము శిక్షార్హులని
గమనించగలరు...అనుసూరి వేంకటేశ్వరరావు

          ****అవేరా***






     

'అయుత కవితా యజ్ఞం
06/03/2016   *
సహస్రకవి 101
 కవిత సంఖ్య:189
కవి: అనుసూరి వేంకటేశ్వరరావు
అంశం : సామాజికం
శీర్శిక: మహిళ2
(08/03/2016 మహిళాదినోత్సవం కోసం)
ప: వేకువకే మేలుకొలుపు
     మేలుకున్న మహిళ
     అందుకొనుము చందనమిదె
     అందుకొనుము వందనం...
చ1:బాక్సింగ్ బరిలో
      ఎదురు లేదు నీకు
      లేతవయసులోనె
      నీవు చాంపియనుగ
      నిలిచావు
      ప్రపంచమే తలవంచి
      సెల్యూట్
      అంటుంది
       నిఖత్ జరీన్
       అందుకోమ్మ వందనం!.....వేకువకే
చ2:నీకాలియందెల
       సవ్వడి
       నాట్య ప్రేమికుల
       హృదయ స్పందన
       నాట్యకళకు
       నీ సేవలు
       అద్వితీయమానందం
       డా.  సువర్చల
       అందుకోమ్మా వందనం!......వేకువకే
చ3:గాంధీజీ కలలుకన్న
      గ్రామ స్వరాజ్యం
      సాకారం చేశావు
      రాజీవుని
      స్వశక్తీకరణ్
      పురస్కారగ్రహీతా
      మరుగుదొడ్లు
       నిర్మించి
       స్వచ్చంగానిలిపావు
       నేనావత్ దేవి
       అందుకోమ్మ వందనం!.....వేకువకే
చ4:ప్రకృతి సేద్యానికి
      స్పూర్తవి నీవమ్మా
      పర్యావరణానికి
      ప్రగతివి నీవమ్మా
      నీవిజయమె మానవాళికి
      మహోపకారం...
      కె. లావణ్యరెడ్డి
      అందుకోమ్మ వందనం!.......వేకువకే
చ5:వికలత్వం
      కకావికలమని
      విశ్వాసం
      గుండెనిండ
       ఉండేలా...
       చాటావూ
       లోకానికి
        వికలాంగుల సేవలో...
        మొగులమ్మా
        అందుకోమ్మవందనం!......వేకువకే
చ6:జర్నలిస్ట్
       జీవితాన
       జయపథాన నిలిచావు
       జరినలిస్ట్ లకే
       స్ఫూర్తివైనిలిచావు
       ఆవులసరితాయాదవ్
       అందుకోమ్మా వందనం!....వేకువకే
చ7:ఆకాశమె హద్దుగా
       ఎగిరేవు గగనాన
       పైలెట్ గా పైకిపైకి
       ఎదిగావు
       బొమ్మ మూగదీప్తి
       అందుకోమ్మావందనం!......వేకువకే
చ8:గ్రామమే ప్రపంచమని
      కలలే చిత్రాలై
       కనులముందునిలిచాయి
       నీచేతి కుంచెలో
       ఎన్నెన్నోభావాలు
       గ్రామ సౌందర్యమే
       విరబూసిన సుమవనం
       సురభివాణీదేవి
        అందుకోమ్మావందనం!.......వేకువనే
చ9:విద్యారంగసేవలో
       పునీతమైనావు
       విశిష్టమహిళవై
       స్ఫూర్తివైనావు
       డా. రమామేల్కొటే
        అందుకోమ్మా వందనం!......వేకువకే
       ******అవేరా******
మహిళ గేయాలు రెండింటిద్వారా
తెలంగాణారాష్ట్ర ప్రభుత్వం విశిష్ట మహిళలుగా ప్రకటించిన
18మంది మహిళామణుల గురించి చెప్పటం జరిగింది
వారందరికీ అభినందనలతో...ఈ ..గేయాలు
రచన:అనుసూరి వేంకటేశ్వరరావు హైదరాబాదు
పై గేయాన్ని ఎవరైనా రచయితపేరులేకుండా
ఇతరగ్రూపులలోపోస్ట్ చేయడం నేరము శిక్షార్హమని
గమనించగలరు..రచయిత:అనుసూరి వేంకటేశ్వరరావు
             ****అవేరా***
29/02/2016
190
29/02/2016
సహస్రకవి 101
కవి: అనుసూరి వేంకటేశ్వరరావు
శీర్శిక: ప్రకృతి ప్రణయ రాగం

ఓ చల్లని సాయంత్రం
పచ్చని వనం...
చెట్లు ఆకాశానికి
చేతులు చాస్తున్నాయి
మబ్బులోని నీళ్ళ
నందుకుంటాయా అన్నట్లు
ఆ నల్లమబ్బు కింద
తెల్లని మేఘాలా
అన్నట్లు గాలిలో ఈదుతూ
కొంగల గుంపులు.....

ఆకాశంలో అప్పుడే
పొడుస్తున్న
తళతళ మెరిసే నక్షత్రాలు....

మరోవైపు
తొంగి చూస్తున్న
అందాల కలువరేడు....

చందమామ
అందాలు చూసి
కొలనున...
రేకువిప్పి
వయ్యారింపు
సొగసు విప్పి
సిగ్గున కలువలు...
...చూసి ఫక్కున
నవ్వెను
అల్లరి మీనమొకటి...

చల్లని గాలులలో
అలలు అలలుగా
తలలూపుతూ
ఆనందాహ్లాదానుభూతిని
పొందుతున్నాయి...
పచ్చని చెట్లు
స్వార్థంలేని చెట్లు
పూలను పండ్లను
భ్రమరాలకు
మనిషికి
దైవానికి
జంతువులకు
అందించి
తరిస్తాయి
త్యాగజీవులైనా
పుణ్యజీవులైనా
పాపం పుణ్యం తెలియదు
మోక్షం అడగవు...

పచ్చని చెట్టును చేరిన
పక్షులు ఉన్నదాంతో
తృప్తి చెంది
హాయిగా ఆనందంతో
కిలకిలారావాలు చేస్తాయి
ఆనందంలోను
విషాదంలోను
అదే
రవము...
హంసద్వనిరాగంలా
కిల..కిల..కిల...

ప్రత్యూష
కెంజాయ వెలుగులు
విరబూయకముందే
మేల్కొని
కిలకిలల
కలకలంలో
ఆ రోజు కార్యక్రమాల
చర్చా గోష్టి...
కిల...కిల...కిల..
సామూహిక
జీవన ప్రదీక....

పిదప ఆహార వేటలో
చితుకుల వేటలో
రోజంతామౌనవ్రతం...
సాయం సంద్యలో...
ముసిరే చీకట్లతో
పరుగు పందెమేసుకుని
గూటికి చేరి
కిల కిలలతో
మౌనవ్రతం విడుస్తాయి
సహచరులతో
ప్రేమగా ఆ నాటి
వింతలు విశేషాలు
చెబుతాయి...
కిల...కిల...కిల.....
ప్రకృతి పరవశిస్తుంది
సహజీవన సమాహారంలో

పచ్చని చెట్టే లేకుంటే??
ప్రకృతికి ప్రణయ రాగాలెక్కడివి??
మనిషికి జీవనరాగమెక్కడిది???
****అవేరా***
ఈ రచన నా స్వంతం దేనికి
అనువాదం అనుసరణ కాదు
కాపీ చేసిన వారు శిక్షార్హులు....
.....అనుసూరి వేంకటేశ్వరరావు
హైదరాబాదు
cell   : 7207289424
Valid  for publication up  to 31stMarch 2016

అయుతకవితాయజ్ఞం
కవితసంఖ్య191
రచన:అనుసూరి వేంకటేశ్వరరావు
07/03./2016

*శీర్శిక:ప్రణయ నాదం"*

సాయం సంద్యవేళ వీచే
సుమధుర పరిమళ
మలయసమీరంలా
కోటి ఊసులు మనసులో కూడి
మంద్రంగా మధుర గానమై
నా వీనుల సోకి
మండు వేసవి పండు వెన్నెల సాక్షిగా
అలసి వాలిన తనువు ఆవిరవుతుంది
వెన్నెల మంచు తెరల్లో
కడిగిన ముత్యంలా కనిపిస్తావు
ముద్దబంతి పువ్వులా ముద్దొస్తావు
మౌనంగా ఉందామంటే రాగమైవస్తావు
వలపును పంచే దేవతవౌతావు
వలపు పరిమళాలకు చిరు రాగాలను చేరుస్తూ
కోయిల కుహూ కుహూలకు
శ్రుతి చేస్తూ రతీమన్మధం లాగా
నువ్వూ నేను సంగమించే క్షణం
నువ్వూ నేను ప్రణయించే క్షణం
నువ్వూ నేనూ ఊసులాకునే క్షణం
నా సుతిమెత్తని అంగుళి
నీ వీణాతంత్రిని మీటగా
పాటై పలికెను శృంగార నైషధం
యవ్వన మధువనిలో
పూవులు విరిసే క్షణం
వెన్నెలలో ఆవిరులు స్వేదపు విరులౌతుంటే
విరుల మకరందపు తేటలు జాలువారుతుంటే
అనంతాకాశం సిగ్గున చీకటిలో దాగుంది
తారల జలతారు చీరగ చుట్టుకుంది
మేనును కప్పుకుంది
మేలుమబ్బు పరదాల చాటున చేరి
నెలరాజు దోబూచులాడగా
పైరగాలి ఘమఘమలలో
సంపెంగల రిమరిమలు
మల్లియల గుసగుసలు
మనసే జాజుల దొంతర కాగా
విరిసే విరజాజుల పరిమళంలో
పాలవెన్నెలలో మురిపాల జల్లులలో
 ఆనందపు సంద్రపు అలలపై తేలెను
మనసు మల్లెపూవై ......
      *****అవేరా****
రచన:అనుసూరివేంకటేశ్వరరావు
హైదరాబాదుcell:7207289424
పై రచన నా స్వంతం దేనికి
అనువాదం అనుకరణకాదు
ప్రచురణకుపంపలేదు
అనుసూరి వేంకటేశ్వరరావు
మీ పత్రిక కు ప్రచురణార్హత 10/04/2016
వరకు మాత్రమే....
****అవేరా****


09/03/2016
192
09/03/2016
కవి: అనుసూరి వేంకటేశ్వరరావు
మంచిర్యాల cell:7207289424
అంశం : సామాజికం
శీర్శిక: గల్ఫ్ కార్మికుడు

ఇంటికి పోదా మంటే
అప్పులోల్ల గోల
పొలము పోదామంటే
పురుగుమందు లేదు
కాయ కష్టమంత
కరువు పాలాయెరా!
బతుకు జూడ
అప్పు పాలాయెరా!
ఏమిసేతు? నేనేమి సేతు?....

గల్ఫ్ పోదామంటే
ఏజెంటు దొంగల
నమ్మి మునిగె
నా తమ్ముడొకడు.
నమ్మునేల
వారిని మోసపోవ??...
సొమ్ము...సొమ్ములని
సొమ్మసిల్ల బోవ..??

ఓరన్న! వీరన్న!
రామన్న! రాజన్న!
ఏజంట్ల దోపిడిని
సర్కారు జూచింది...
గడ్డుబతుకుల కోసం
చేతులే చాచింది...
భుజాలే తట్టింది..
ఏజెంటులే వద్దు
ప్రభుత్వమే ముద్దు
గల్ఫ్ కంపెనీలు
రెక్క కట్టుక వాలు
తెలంగాణ సర్కారు ముందు..!

ఒప్పంద పత్రాలు
జోరుగా చేసేను
సర్కారు నీడలో
ఉద్యోగ మొచ్చేను..!
ఏజంట్ల బాధలు
ఏజంట్ల మోసాలు
అటకెక్కించి
మూతపెట్టు...!!
సర్కారు నీడలో
లేబరు చట్టం కింద
హక్కులే వచ్చేను
ఆనందమొచ్చేను
కంపినీలన్ని
ఇంపుగా చూసేను...!
*************
రచన:అనుసూరి వేంకటేశ్వరరావు
మంచిర్యాల
పై కవిత నా స్వంతం దేనికి అనువాదం
లేదా అనుకరణ కాదు ముందు ప్రచురణకు పంపలేదు
.......అనుసూరి వేంకటేశ్వరరావు.
 ****అవేరా***







పాతిక వసంతాలు పరుగున గడిచాయి
12/03/2016
సత్యశ్రీ రాంకోటేష్ దంపతులకు
పాతిక వసంతాల సిల్వర్ జూబిలీ
వివాహ మహోత్సవ శుభాకాంక్షలు!!
అభినందనలతో ....మీ..A,V,Rao Dy.S.E
కవిత సంఖ్య:193
రచన: అనుసూరి వేంకటేశ్వర రావు

పెళ్ళి పందిరిన బిడియపు చూపులు
తొలి వసంతాన తొలకరి వానలు
ప్రేమ జల్లులో విరిసిన హరివిల్లులు
మరుపు రాక
మరువ లేక
జ్ఞాపకాల దొంతరలు
ఎన్నొన్నోమధుర స్మృతులు
పాతిక వసంతాలు పరుగున నడిచాయి
వడి వడిగా గడిచాయి
చిగురించిన జీవితాలు
ప్రణయానికి"ప్రతీక్"గ
"ప్రణవ్"మై నిలిచాయి
మీ ప్రేమ
మీ ప్రేరణ
దివిటీలై
దారిచూపు
చిగురులు శాఖలు తొడిగి
మహావృక్షాలై నిలవగ...!
    ****అవేరా****


అయుత కవితా యజ్ఞం

12/03/2016
సహస్రకవి 101
 కవిత సంఖ్య:194
కవి: అనుసూరి వేంకటేశ్వరరావు
అంశం : సామాజికం
శీర్శిక: కల్తీ
*********
ప్రిమియర్ బియ్యంలో
నాసిరకం కల్తీ
పాలల్లో నీరు కల్తీ
కాదు...కాదు...
నీటిలోనే పాలుకల్తీ
పప్పులోన
మరోపప్పు కల్తీ
ఉప్పులోన
స్వచ్ఛత కరవై కల్తీ
పసుపులోన
రంగు పొడి కల్తీ
కారంలో ఎరుపు కల్తీ
నూనెలలో మరోనూనె కల్తీ
మిరియాలలో కల్తీ
టీపొడిలో గొర్రెలశుద్దము కల్తీ
ఇసుకలో ఫిల్టర్ ఇసుక కల్తీ
పెంటమట్టిలో మొరం కల్తీ
ఎర్రమట్టిలో సున్నపు మట్టి కల్తీ
సిమెంటులోన కల్తీ
సున్నపు రంగులలోకల్తీ
కల్లులోన కల్తీ
గౌడుల జీవన బృతి కల్తీ
ప్రేమికుల మనసులు కల్తీ
తోటి మనిషి కల్తీ
సాటి మనిషి కల్తీ
కుటుంబ ప్రేమలు కల్తీ
ఇరుగు పొరుగుల పలకరింపులు కల్తీ
కల్తీ ...కల్తీ....కల్తీ
నాటి ప్రహ్లాదు చక్రి బోలి
ఇందుగలదందులేదను
సందేహము వలదు
ఎందెందు వెతికి చూచిన
అందందు గలదు సర్వోపగతంబు కల్తీ!!

****అవేరా***






     

అయుత కవితా యజ్ఞం
అయుత కవితా యజ్ఞం
12/03/2016
సహస్రకవి 101
 కవిత సంఖ్య:195
కవి: అనుసూరి వేంకటేశ్వరరావు
అంశం : సామాజికం
శీర్శిక: జ్ఞానం

 విద్వత్తు
ఎంతయున్నను గాని
పరమాత్మ లీల
మవగతముకాదు
పాపపుణ్యాలనెంచలేవు
పరమాత్మదృష్టి
అచంచలము
అనంతము
నిస్పక్షపాతము
పాపికైనా
పుణ్యాత్ముడకైనా
అదే ఆకాశం....
అదే వర్షం.....
అదేభూమి......
సర్వజనులపై
సర్వాంతర్యామి
అదేదృష్టి......

తెలియకచేసిన పాపము
తండ్రివలె క్షమించును
సర్వోపగతుండు
ఆస్థికుని
నాస్తికుని
రెంటికి నడుమ
నడయాడే వారిని
అందరికీ సమదృష్టే
తప్పు తెలుసుకొని
శరణన్న వారిని
కాపాడి దరిజేరును....

సద్గుణాలు మనిషికి అలంకారాలు
దుర్గుణాలు మచ్చలు
పరాత్పరుణ్ణి
సాక్షాత్కరింప చేసుకొన
వేదజ్ఞానం ఒక్కటే
చాలదు
విద్వత్తెంత వున్నా
భక్తి లేనిదే
దైవలీలలు అర్థం కావు....

****అవేరా***






     

అయుత కవితా యజ్ఞం
అయుత కవితా యజ్ఞం
12/03/2016
సహస్రకవి 101
 కవిత సంఖ్య:196
కవి: అనుసూరి వేంకటేశ్వరరావు
అంశం : ప్రకృతి
శీర్శిక: పిచుకవిలాపం

జనంమద్యన
జల్సాగా బతికాము
ఒకప్పుడు
ఊరూరా
ఇళ్ళనుపంచుకొని
ఊరపిచ్చుకలయ్యాం
టెలిఫోను వైర్ల మీద
దొంగా పోలీసాడాము...!
వైరుకొమ్మచ్టిలాడాము..!
ప్రత్యూష కిరణాలు
వెలుగు నింపే వేళ
కిచకిచ కబుర్లతో
ఆనందంగా గడిపాము
చెట్లపైన .....

నేడు గూడు కట్టగా
చెట్టులేదు
ఆడుకుందామంటే
టెలిఫోను వైర్లులేేవు
సహచరులూ లేరు
అందరూ అడవిబాటపట్టారు...

వైరులేని ఫోనులంట
మా కొంప ముంచాయి
సెల్లు ఫోనులని
సెల్లు టవర్లని
వచ్చి మా బ్రతుకు టవర్ ను కూల్చాయి
రేడియేషన్ అని వచ్చి
మా బతుకు వైబ్రేషన్ చేసాయి...

పెద్దవూరు పెద్దటౌను
అయితే మా పిల్లలకు
పెళ్ళి సంబంధాలు
బారులు తీరేవి
ఇప్పుడు వామ్మో అని
అడవిలోకి పారిపోతున్నారు
పిల్లలు బ్రహ్మచారులుగా మిగిలి పోయి
సంతతి నశించి పోతుంది
ఉన్నవాళ్ళు రేడియేషన్ పుణ్యమాని
అర్ధాయుష్షుకే
టపా కట్టేసారు
మొండి ప్రాణులు
కొందరం
మొండిగా బ్రతికేస్తున్నం
మంచి రోజులొస్తాయని
ఆశతో.....
మా పిచ్చుక బ్రతుకు
రేపటి మనుషులకు
చరిత్రగా మిగిలిపోవలసిందేనా???

****అవేరా***






     

అయుత కవితా యజ్ఞం
అయుత కవితా యజ్ఞం
12/03/2016
సహస్రకవి 101
 కవిత సంఖ్య:197
కవి: అనుసూరి వేంకటేశ్వరరావు
అంశం : సామాజికం
శీర్శిక: బడ్జట్

ప్రభుత చేతిలో
మంత్రదండము
యేడాదేడాది
యేటికి
ఎదురీదే సామాన్యునికి
విషమ పరిస్థితి
ఖాళీ బొక్కసానికి
మెరుగులు దిద్ది
నింపడానికి
కొత్త పన్నుల
రూప కల్పనకు
వేదిక.....

పన్ను పోటుతో
నడ్డి విరుగుతున్న
ఉద్యోగులు
ఆదాయ పన్ను
రాయితీకి
ఎదురుచూసి
వాచిన కన్నులు
ఆందోళన చెందే మనసు
తెరపి చెందేరోజు
ఉత్కంఠకు
తెరదించేరోజు....

పల్లెకింత
పట్నానికింత
రంగు రంగుల
రంగాన
హంగులున్న
పరిశ్రమలకింత
శాఖ శాఖలకు
కేటాయింపులు
అయిన మంత్రి
కాని మంత్రి
నావాడు
నీవాడు
నిజ నిర్థారణలేని
కాకుల లెక్కలు
ఖర్చులకోసం
నిధుల పంపకం
వడ్డింపుల
సడలింపుల
సమ్మిళితం......
మోద
ఆమోదాల
సమ్మిళితం....

అభివృద్ధి సుద్దులు చెప్పి
మొద్దురాచిప్పలై
పేదవానికి
ఇచ్చే వాటిని
బూతద్దంలోచూపుతూ
చేస్తున్న క్షవరాన్ని
తిమిరంలోకలిపేస్తూ
మెడకోగుదిబండనేసి
కదల లేని పేదలకు
బంగారు నిచ్చెనలేస్తారు

పార్లమెంటైనా
అసెంబ్లీయైనా
బడ్జటు సమావేశాలు
మాయామంత్రాల
మెస్మరిజం....!
మాటల గారడీల
హిప్నోటిజమ్..!
మీడియాకు
మురిపాలపండగ...!!

   ****అవేరా****


అయుత కవితా యజ్ఞం
12/03/2016
సహస్రకవి 101
 కవిత సంఖ్య:198
కవి: అనుసూరి వేంకటేశ్వరరావు
అంశం : సామాజికం
శీర్శిక: ఆడంబరము

నిజ జీవితాన
నీ నిజస్థితినెరుగుము
పొరుగువానిని చూచి
ఆడంబరమునకు పోక
నిజస్థితిని జీవించుము
నీ చేతిన యున్నదె రొఖ్ఖము.....
దూరపు కొండలు నునుపను
నిజమును గనుము
మబ్బులో నీళ్ళు జూచి
నీళ్ళు ఒలక బోసుకోకు...!!

అప్పు చేయకు నెన్నడు
నాడంబరమునకు బోయి
క్రెడిటు కార్డులనగ
జేబున విషపు తేళ్ళు
అధికవడ్డీయప్పు
నీ తలపై నెక్కిన తెల్లయేనుగు
చంపియె వదులును....

తాగుడు
జూదము
తిరుగుట
వ్యసనముల
దరిజేరకు
జేరినయవి
లాగును ఊబిలోకి
బయటకు వచ్చుట కల్ల
నీకు దూరమౌను పిల్లజెల్ల ...!!


****అవేరా***






     

అయుత కవితా యజ్ఞం

అయుత కవితా యజ్ఞం
12/03/2016
సహస్రకవి 101
 కవిత సంఖ్య:199
కవి: అనుసూరి వేంకటేశ్వరరావు
అంశం : ప్రేమ
శీర్శిక: నిరీక్షణ(భగ్న ప్రేమికుని ఆవేదన)
      **********
అన్నీ వున్నా
నీవులేని
జీవితం శూన్యమే ప్రియతమా!
నా జీవితాన
వసంతాగమనానికి
స్వాగతచినుకై రావా..!
నవ వసంతం కోసం
గొంతు నిండిన
రాగాలను
వీనుల విందుగ
కుమ్మరించాలని
లేమావి చిగురుల
రుచులనాస్వాదించాలని
ఆశగ ఎదురు చూస్తున్న
గండు కోయిలలా,...
ఎదురుచూస్తున్నా
నీ వెన్నెల కురిసే
కన్నులవొలికిన
మధురభావనలు,
మనసున విరిసిన
ఆనంద సుమ వీచికలు
నీ సుమధుర
భాషణా చతురత
కవ్వింపు ఆటలు
చిందించిన ప్రేమలు
మరపు తోటకు పోనంటున్నాయి!
గుండెలోగూడుకట్టుకున్నాయి!
అంబరమంటిన ప్రేమ
ఆర్ణవ లోతులలో నిక్షిప్త నిధియైనది!
మరుపురాక...!
మరువ లేక...!
చకోర పక్షినైనాను...!
నిత్య నిరీక్షణలో....!

****అవేరా***






     

అయుత కవితా యజ్ఞం

13/03/2016
సహస్రకవి 101
 కవిత సంఖ్య:**200**
కవి: అనుసూరి వేంకటేశ్వరరావు
అంశం : సామాజికం
శీర్శిక: వెన్నుదన్ను

నీదు రెక్కల కష్టమే
నీకు దన్ను...!
నీ బ్రతుకు విజయమే
మాకు దన్ను...!
రైతులేని రాజ్యము
రాబందు బోజ్యము..!

నీదు సంక్షేమమే
దేశ సంక్షేమము
నీదు సంక్షోభమే
దేశ సంక్షోభము..!

కడుపు నిండని రైతు
కడలినీద గలడా?
కూలు సేద్యము
కాద బీడునేల...!

అన్నము పెట్టు వాడికి
సున్నము పెట్టుట పాడియా..??
దన్నుగ నిలవ వలె ప్రభుత..!
వెన్ను తట్టదా ప్రకృతి..??

చేవజచ్చిన రైతు
చేటు దేశానికి...!
పాడి పంటలతోనె
పావనమ్మగు పల్లె....!

రైతురాజవ్వగా
గ్రామస్వరాజ్యమివ్వరా..!

****అవేరా***